પહેરી લે ચહેરો / પન્ના નાયક

62 - પહેરી લે ચહેરો / પન્ના નાયક

તારા

ભીતરના ભાવથી

ચહેરાની રેખાઓ

કરચોલાઈ ન જાય

એમ 

પહેરી લે ચહેરો

કે

કથકલીના નૃત્યકારની અદાથી

કરી લે કલાત્મક make-up.

ઝાંખા થતા દીવાઓને

રાત્રિની આતશબાજી

ઢબૂરી દે એમ

દરેક ખીલતા જતા ફૂલ સાથે

તાજા થતા જતા તારા જખમોને

ત્વચાની અંદર જ સમાવી દે.

મર્મસ્થળે ઊઠતી વેદનાને

એવા તરંગોમાં વણી લે

કે એમાંથી ઊઠતું ઘેરું સંગીત

જાણે શાંત જલ પર

સરી રહેલી

કોઈ નૌકામાંથી આવતું હોય.