56.13 - ગીત – ૧૩ - દશે ચડીને મેં તો કાચો નખ કાપ્યો ! / રાવજી પટેલ
દશે ચડીને મેં તો કાચો નખ કાપ્યો !
અલી મેં તો અધવચે સાહ્યબાને રાખ્યો...
દશે ચડીને મેં તો કાચો નખ કાપ્યો !
કાજળની મશે મેં તો દીવો કીધેલો;
દીવામાં નાનેરો દીવો દીઠેલો...
અલી એનો ઝબકારો આંખોમાં આંજ્યો...
દશે ચડીને મેં તો કાચો નખ કાપ્યો !
ડસ ડસ આસુંડે પીઠી મેં ધોઈ;
ઢીંચણની ચોરી પર માળાઓ પ્રોઈ
અલી અધપડ્યો બોલ વહાલો ઉથાપ્યો...
દશે ચડીને મેં તો કાચો નખ કાપ્યો !
0 comments
Leave comment