20 - ભાષા છે મારી ઘેલી ને ઘેલી ગઝલ લખું / પંકજ વખારિયા


ભાષા છે મારી ઘેલી ને ઘેલી ગઝલ લખું
કરવી છે વાત રણ વિશે, શબ્દો સજલ લખું

પોતીકું દર્દ છે અને પોતીકા શબ્દ, પણ –
ઊઠે છે તોય પ્રશ્ન કે કોની નકલ લખું ?

ભૂંસાઈ જાય જાત પછી પણ અમર રહે
સૂરજની સાખે એવો ઈરાદો અચલ લખું

આ દર્દમાં ઊપજ હવે કંઈ ખાસ રહી નથી
ચાલો, વ્યથાની સાવ હું નવલી નસલ લખું

જેનાથી વાડી મહેંકતી ને લીલી રહે સદા
છાતીએ એવા નામનો કૂવો અતલ લખું
(૯ માર્ચ ૧૯૯૪)



0 comments


Leave comment