અમને ગુરુ મળ્યા છે ગરવા / મનુભાઈ ત્રિવેદી 'સરોદ'

9 - અમને ગુરુ મળ્યા છે ગરવા / મનુભાઈ ત્રિવેદી 'સરોદ'

અમને ગુરુ મળ્યા છે ગરવા-

એના શબદ ગયા સોંસરવા :

અમને ગુરુ મળ્યા છે ગરવા.

આભ અવાકની વાણ સુણાવી,

ઝમ્યા નેહ મેઘરવા;

ટીપે ટીપે ધાર ઝવી, એને

ઝીલી થયા અમે નરવા.-

અમને ગુરુ મળ્યા છે ગરવા.

અંબરથીય અતિ અતિ ઊંચે

બાંધ્યા ચિત્ત ચંદરવા; -

મન માંડવડે મનહર જ્યોતિ

જળી રહી તમ હરવા. -

અમને ગુરુ મળ્યા છે ગરવા-

શબદ સોંસરવા સર્યાં મૌનમાં,

મોંઘે મોત એ મરવા;

સદગુરુ, અમને જુગતિ બતાવો

પંડ પાર પરવરવા. -

અમને ગુરુ મળ્યા છે ગરવા.