ખેડુઓ ટાકર ભોમના / મનુભાઈ ત્રિવેદી 'સરોદ'

15 - ખેડુઓ ટાકર ભોમના / મનુભાઈ ત્રિવેદી 'સરોદ'

અમે રે ખેડુઓ ટાકર ભોમના હો જી.

કૂવા અમ ઊંડા અપરંપાર,

મથીમથી સીંચીએ જળધાર,

જંગ રે જામ્યા છે જીવનજોમના હો જી. -

અમે રે ખેડુઓ ટાકર ભોમના હો જી.

વિરલા આવે છે વરસાદ,

લાવે મારા હરિવરની યાદ,

લાવે રે સંદેશા ગેબી વ્યોમના હો જી. -

અમે રે ખેડુઓ ટાકર ભોમના હો જી.

કરડા તપે સૂરજરાય,

દવલા એ દવ સેવ્યા ન જાય,

અવળા ઉપચારો લાગે સોમના હો જી. -

અમે રે ખેડુઓ ટાકર ભોમના હો જી.

કણકણ નીપજે જે આહીં

સમજી લો લોહીની કમાઈ;

ફૂલડાં ખીલ્યાં એ જાણે હોમનાં હો જી. -

અમે રે ખેડુઓ ટાકર ભોમના હો જી.