પીડ પરખી નવ જાય / મનુભાઈ ત્રિવેદી 'સરોદ'

35 - પીડ પરખી નવ જાય / મનુભાઈ ત્રિવેદી 'સરોદ'

હીરા ને માણેક બહુ જન પરખે,

પીડ પરખી નવ જાય રે હો જી;

જનમ જનમની પીડા પરખે

સંત સાધુ ઓર સાંઈ -

મેરા ભાઈ રે,

પીડ પરખી નવ જાય રે હો જી.

તન કેરી પીડા ને મન કેરી પીડા,

અંતરપીડ સવાઈ રે હો જી;

એ રે પીડને પીડ કોણ કહે

જે રહે ગાણે ગવાઇ ? -

મેરા ભાઈ રે,

પીડ પરખી નવ જાય રે હો જી.

રોમ રોમ વિરહાતુર તલસે,

ઝીણી અગન લગાઈ રે હો જી;

એક ઘડીનોય પોરો ન પાવે,

એવી રામદુહાઈ : -

મેરા ભાઈ રે,

પીડ પરખી નવ જાય રે હો જી.

એવે ઊઘડે અમરત અખિયાં,

પીડ એ પરમ કમાઈ રે હો જી;

દાસ સરોદને સદગુરુ મિલિયા,

એની ગાઉં વધાઈ :-

મેરા ભાઈ રે,

પીડ પરખી નવ જાય રે હો જી.