સોણું આવ્યું સાગરનું / મનુભાઈ ત્રિવેદી 'સરોદ'

40 - સોણું આવ્યું સાગરનું / મનુભાઈ ત્રિવેદી 'સરોદ'

મટકી કેરી માછલડીને સોણું આવ્યું સાગરનું;

સ્વપ્ન ગયું પણ તે દિનથી એને નીર ન ભાવ્યું ગાગરનું. -

સોણું રે આવ્યું સાગરનું.

જે જળમાં રહી નિત્ય વિહરતી,

એ જળથી જાણે રહે ડરતી;

કેર કરી ગયું હોય ન કારી કામણ કોઈ કીમિયાગરનું ! -

સોણું રે આવ્યું સાગરનું.

કેમ કરી ઘર બાર નીસરવું ?

હોય ન જળ તો શી વિધ તરવું ?

ક્યાં હશે મટકી ? ક્યાં હશે સાગર ? કારણ રોજ ઉજાગરનું. -

સોણું રે આવ્યું સાગરનું.

મટકી તરતી સાગર - તાણે,

માછલી એટલડુંય ન જાણે;

ઉપર હસતું મોં ન નિહાળે નટખટ નટવર નાગરનું. -

સોણું રે આવ્યું સાગરનું.