દીવાસળી / મનુભાઈ ત્રિવેદી 'સરોદ'

64 - દીવાસળી / મનુભાઈ ત્રિવેદી 'સરોદ'

દીવાસળી

આ છે દીવાસળી,

આ કાયાની કાંડી રૂડી દીવાસળી.

જૂજ ઝાઝી શગતિ કેરો ગંધરક લગાડ્યો;

ઝીણી ને જાડી જ્યોતે રહે છે જળી. -

આ કાયાની કાંડી રૂડી દીવાસળી.

તનડું તપાવે ને એ મનડું મિટાવે;

જીવડો જલાવે એવી અગનકળી. -

આ કાયાની કાંડી રૂડી દીવાસળી.

કટોકટ કાઠી યા ને ટપકુંક જ્યોતિ;

જળતાં કરે છે દુનિયા એ ઊજળી. -

આ કાયાની કાંડી રૂડી દીવાસળી.

શગ સળગે છે એની સત રૂપ સાખી;

સમજી સરોદે અવિચળ જ્યોતિ રળી.-

આ કાયાની કાંડી રૂડી દીવાસળી