22 - લોહી જ લોહી છે / અશોક ચાવડા 'બેદિલ'
પ્રતિબિંબ તૂટ્યાની ક્ષણે લોહી જ લોહી છે;
હોવા વિશેના દર્પણે લોહી જ લોહી છે.
પથ્થરની ઈશ્વર એમ ક્યાં સ્હેલાઈથી બને?
જા, દેખ પેલા ટાંકણે લોહી જ લોહી છે.
સંબંધ લોહીનો હવે ભૂલી ગયા છે સૌ,
ચારેતરફ એ કારણે લોહી જ લોહી છે.
તારા જવાથી ઠેસ ઉંબરનેય વાગી છે,
પાછું વળી જો આંગણે લોહી જ લોહી છે.
'બેદિલ' હવે તું આંખ મીંચે એ જ સારું છે,
અશ્રુ નથી આ પાંપણે લોહી જ લોહી છે.
0 comments
Leave comment