39 - ચર્ચાય છે / અશોક ચાવડા 'બેદિલ'
તું હવે એ રીતથી હમણાં બધે ચર્ચાય છે;
યાદ નામે સાવ સૂકી ડાળખી વ્હેરાય છે.
એક રેખા જે હતી તારી હવે એમાં નથી,
એ જ કારણસર હથેળી રોજ સળગાવાય છે.
તું મને ભૂલે નહીં તો શું કરે પણ આખરે,
આંખમાં ક્યાં રેતના કણ કોઈથી સચવાય છે?
ચાલ છૂટા થૈ જઈએ આટલેથી આપણે,
આ તરફ તારું નગર મારું નગર વંચાય છે.
જિંદગીની આદતો 'બેદિલ' હજી છૂટી નથી,
કોણ જાણે છું ચિતામાં તોય ચિંતા થાય છે.
0 comments
Leave comment