94 - અલખનો આનંદ / મનુભાઈ ત્રિવેદી 'સરોદ'
આપણે તો, ભાઈ, અલખનો આનંદ.
સાયર લ્હેરું થોડિયું,
મારે ઘટ ઘણેરા છંદ : -
આપણે તો, ભાઈ, અલખનો આનંદ.
દુઃખ અને સુખ સોહ્યલાં, ભાઈ,
દોહ્યલો દૂજો રંગ;
રંગ ચડે જેને રામનો એ તો
ખલકે વાળે ખગ :
ધોમ ધખારે પગલે એને
પ્રગટે પૂરણ ચંદ. -
આપણે તો, ભાઈ, અલખનો આનંદ.
ભગતિમાં નહીં ભીષણતા, એ તો
રંગ રેલાનાં રૂપ;
હસતાં રમતાં નમતાં જાતાં
મરમી ચૂપાચૂપ :
એ રે એંધાણીએ આવજો વીરા,
પ્રાણ કરી નિષ્પંદ. -
આપણે તો, ભાઈ, અલખનો આનંદ.
0 comments
Leave comment