95 - ભગતિની વાટું / મનુભાઈ ત્રિવેદી 'સરોદ'
વનવગડામાં કાંટું, એમાં
ફૂલડાં કેરી ફાંટું રામ;
એવી ભગતિની વાટું.
ભડભડ સહરા સીમ બળે, એમાં
ઝરમર ઝરમર છાંટું રામ; -
એવી ભગતિની વાટું.
પ્રાણ વિજોગી ઘેલો ઘૂમે,
શમણાં આવે સર શો ઝૂમે,
નાથ ચરણમય ભૂમિ ચૂમે,
વ્યથિત હૈયું ને સ્વર કલ્લોલિત.
સ્નેહ તણું એ સાટું રામ; -
એવી ભગતિની વાટું.
આંખ અઘોર વિરાટ વિલોકે,
ઘુમરાતી અથડાય ત્રિલોકે,
નરસિંહ મીરાં ન્યાળી ચોંકે,
દરશન રસિયો દે આ મોકે,
સરોદ તો હું ખાટું રામ; -
એવી ભગતિની વાટું.
0 comments
Leave comment