108 - પામ્યા પૂરણ એને / મનુભાઈ ત્રિવેદી 'સરોદ'
પામ્યા પૂરણ એને મુખડે તાળાં,
મૌન ગ્રહે મરમાળા રે.
પવન સૂસવે, દરિયો ઘૂઘવે,
બોલે અધૂરપવાળા રે;
સૂરજ ચાંદો તારા ચમકે,
ચમકે ઓછપવાળા રે. -
પામ્યા પૂરણ એને મુખડે તાળાં.
આસન વાળી ગિરિ સમ બેઠા,
કંઠે શૃગ શી માળા રે;
અંગે વહે એને ઝરણ અલૌકિક
કેવલ કરુણાવાળા રે. -
પામ્યા પૂરણ એને મુખડે તાળાં
પાસ બેસે એનાં પંડને પલટે,
કરે ભીતર ભભકાળા રે;
તીરથ એને મન તનની તૃષ્ણા,
પૂજન મનના ચાળા રે. -
પામ્યા પૂરણ એને મુખડે તાળાં.
એવા પુરુષનાં દર્શન કરવા
ચલો સરોદ ગિરીઢાળા રે,
સિદ્ધાચળને મારગ રાજે
મન માલેક મતવાલા રે. -
પામ્યા પૂરણ એને મુખડે તાળાં.
0 comments
Leave comment