ઉચ્ચારો છે / મહેન્દ્ર જોશી

2.25 - ઉચ્ચારો છે / મહેન્દ્ર જોશી

અગડમ બગડમ ઉચ્ચારો છે

ભૈ, આ કોના ઉદગારો છે

કોણ કહે છે કોણ સૂણે છે

હા-હા હો-હો દેકારો છે

*એ ઊભો ત્યાં નીચી મૂંડી

મારો ઈશ્વર બિચ્ચારો છે

સાચું કહી દે શું વાવ્યું છે ?

કોના ધડનો આ ક્યારો છે ?

લાશ ઉપર જઈને બેસે છે

એક પતંગું સધિયારો છે

માના સ્તન જેવા આ ઘરમાં

શાને અમથો કજિયારો છે

વાદળ માટે શું ઝગડો છો ?

જળમાં જેનો મઝિયારો છે

હું યે કવિ છું – હું યે કવિ છું !

માથે ખડનો મણ ભારો છે !

* સ્મરણ : મનહર મોદી

૧૬/૦૬/૨૦૦૫