1.8 - અવળી ચાલ / સંજુ વાળા
અવળી ચાલ, અજાયબ કેડા,
એક જ ડગલે માપી લીધા ત્રણે કાળના છેડા.
ભાતભાતનાં ભાવભોજથી તસતસતાં તરભાણાં,
અબૂધની આગળ મૂકેલાં અઘરાં કોઈ ઉખાણાં
ચાખે એ સહુ નાચે લઈને માથે નવ નવ બેડાં.
અવળી ચાલ, અજાયબ કેડા.
ધખધખતી એક ધૂન ચડાવી લખીએ લખ સન્દેશા
પગ થઈ જાતા પવનપાવડી, હાથ બન્યા હલ્લેસાં
મીટઅમીટે એ જગ જોવાં, વિણ વાયક વિણ તેડાં.
અવળી ચાલ, અજાયબ કેડા.
(૨૨-૦૪-૨૦૦૫)
1 comments
Harish Dasani
Aug 09, 2021 12:02:53 PM
અવધૂતી મસ્તીખોર ગીત
0 Like
Leave comment